14 Extra Curas climaticas cunter la tuberculosa Sanatori Schatzalp a Tavau, 1909. Da 1870 fin 1950 sa laschavan tractar en il clima alpin dal Grischun persunas malsaunas da tuberculosa che derivavan da tut il mund. Grazia a lur influenza èn ils vitgs purils sco Tavau ed Arosa sa sviluppads a lieus da cura internaziunals. Ussa marcavan grondas chasas da cura cun lungas terrassas il maletg dals vitgs.Fotografia: Museum retic + Il Sanatori Bernina a Tavau-Plaz, enturn 1920.Fotografia: Museum retic + Il Sanatori turitgais Tavau Clavadel, 1924.Fotografia: Emil Meerkämper, Museum retic + Cura da repaus a Tavau, enturn 1900‒1920. L'element il pli impurtant da la terapia da tuberculosa era la cura quotidiana a l'aria frestga da pliras uras en il liber. Il medi tudestg Alexander Spengler, che lavurava a Tavau, aveva remartgà che la populaziun indigena na pativa betg da tuberculosa. El declerava quai cun il clima autalpin e tractava pazientas e pazients sistematicamain cun curas a l'aria da muntogna.Fotografia Museum retic + Pazientas e pazients a la cura da repaus a Tavau, enturn 1910.Fotografia: Possess privat + Ils medis Lucius Spengler ed Eduard Neumann visitan in pazient en il sanatori Schatzalp a Tavau, enturn 1905.Fotografia: Possess privat + Spidarola da giaglioffa «Mignion», enturn 1930. Ils scratgs da pazientas e pazients da tuberculosa eran fermamain contagius. Per evitar che la malsogna sa derasia, stuevan tut las persunas malsaunas dals lieus da cura adina avair cun sai ina spidarola da giaglioffa. Pervia da sia colur ha quella survegnì il surnum «Blauer Heinrich».Fotografia: Museum retic + Salun en il sanatori Schatzalp Tavau, enturn 1905. Per render a las pazientas ed als pazients bainstants pli agreabla la dimora da plirs mais u onns en las chasas da cura, sumegliavan quellas per part hotels luxurius. Occurrenzas socialas faschevan medemamain part da la purschida.Fotografia: Possess privat + La dimora da cura da sia dunna Katia Mann en il sanatori Wald a Tavau l'onn 1912 ha inspirà il scriptur Thomas Mann a ses roman «Der Zauberberg», cumparì l'onn 1924.Fotografia: Biblioteca da la SPF Turitg, archiv Thomas-Mann / Fotograf: nunenconuschent / TMA_0526 + Bigliet da tren, enturn 1950. Perquai che la durada dal tractament da tuberculosa n'era betg da prevair, valevan ils bigliets da las Viafiers federalas svizras fin a la guariziun.Fotografia: Museum retic, collecziun «Blauer Heinrich» +