1942

furma da lain per marzipan u anisets

probablamain Surselva, enturn il 1700

Tar blers firads ecclesiastics u tar chaschuns spezialas d'ina vita tutgan pastizarias spezialas. Gia a la fin dal temp medieval enconuschev'ins dultschims or dal marzipan custaivel. En il 17avel tschientaner hai cumenzà a dar imitats or da pasta dad anis – ils mandels eran chars e vegnivan remplazzads cun farina alva.

Cun ina furma da lain, arschiglia, crap u metal pudev'ins modellar ed illustrar la pasta pauc levada. Motivs populars eran scenas biblicas, plantas, animals u cors. L'entagliader da questa furma da lain ha tschernì la negla, ina flur derasada en l'art popular grischun. Il museum posseda ina pitschna collecziun da 55 furmas da pastizaria utilisadas en il Grischun.