Roveredo, senza data

«Nus al bavain trais giadas il di ed igl ans para che nus na pudain bunamain betg pli viver senza el», ha l'Union dals Grischs descrit il 1926 il consum da café en il Grischun. I na sa tractava però per gronda part betg da café pur. Per regla maschadav'ins lien ingredienzas pli bunmartgadas sco cicoria, lupinas, glogns u graun. Brastular brastulav'ins il café a chasa, savens sur il fieu avert cun brastulins simpels sco noss exponat.

Ils emprims cafés en l'Europa han Grischuns avert gia il 17avel tschientaner a Venezia. Per Cuira è documentada l'emprima butia da café per l'onn 1772. Ma café pur è restà fin en la segunda mesadad dal 20avel tschientaner in product da luxus che blers han strusch pudì sa prestar.