Valens, 2006

La «chapellina da pastg» ha l'artista da fieuter Trijnie Veenstra creà il 2006 per l'exposiziun «Hauptsachen. Die Kopfbedeckung: Schutzfunktion, Mode und Machtdemonstration» en il Museum retic.

Ord vista istorica tutgava ina cuvrida-chau adina tar ina gardaroba cultivada. Modas da dir ch'ins dovra anc oz, sco per exempel la locuziun tudestga «unter die Haube kommen», fan allusiun al fatg che cunzunt dunnas maridadas cuvrivan per regla lur chavels. A partir dals onns 1960 ha il chapè pers sia impurtanza represchentativa. Oz n'è el betg pli in'obligaziun sociala, mabain in segn d'exclamaziun modern. Quai illustrescha la «chapellina da pastg» sco object contemporan en nossa collecziun.