06 – Posiziun dal object

Nobels tranter els

1. plaun

06

Nobels tranter els

Chaschetta da vopnas, Sched, 1. mesadad dal 14avel tschientaner
06

Chaschetta da vopnas, Sched, 1. mesadad dal 14avel tschientaner

L'uvestg da Cuira aveva da pertgirar per l'imperatur ils pass sur las Alps. Sco cuntraprestaziun ha l'imperatur dotà l'uvestg cun privilegis e cun bains funsils. A medem temp controllavan famiglias noblas indigenas numerus dominis pitschens. Sco segn da lur pussanza locala han ellas construì en blers lieus chastels. Quels servivan sco abitadis e sco manaschis agriculs. Ina funcziun strategica-militara avevan ils paucs.

Noss object d'exposiziun deriva da quests circuls da la noblezza feudala retica. El è fatg or da lain da fau, surtratg cun ina taila da glin e picturà cun vopnas. Talas «truclettas d'amur» u «chaschettas d'amur» servivan savens sco regals da nozzas. En quest cas pudess la chaschetta esser vegnida surdada enturn l'onn 1365 a chaschun da las nozzas dad Anna da Razén cun il cont Johann da Werdenberg.

Durant il temp medieval tardiv ha la Rezia pers sia impurtanza sco pajais da pass, uschia ch'er la pussanza da l'uvestg da Cuira è sa reducida. En il pajais hai dà numerusas faidas. Novas classas dominantas han cumenzà a sa furmar.

Ihr Browser unterstützt kein HTML5 Audio.