Cuira, probablamain 1564

L'uschenumnà «taler dal capricorn» da la Lia da la Chadé è forsa la munaida la pli enconuschenta dal Grischun. Il museum ha cumprà quest exemplar d’in martgadant ad Amsterdam.

Il bul per questa munaida d'argient rara ha taglià il renumà medaglier turitgais Hans-Jakob Stampfer (1505–1579). Oz èn enconuschents anc ca. 15 exemplars da quest taler.

Il taler dal capricorn è ina da las munaidas las pli extraordinarias da la partiziun numismatica dal museum. Quella cumpiglia var 20'000 objects da l'istorgia monetara ed economica. Ina sutgruppa cuntegna 5000 munaidas e medaglias grischunas, probablamain la pli gronda collecziun da quest gener.