lieu nunenconuschent, 1823

Da Cuira a Milaun en mo 36 uras! L'avertura da las vias sur il Pass dal Spleia ed il Pass dal San Bernardino ha scursanì massivamain il temp da viadi vers il sid. Avant che la posta ha surpiglià las colliaziuns da charrotschas il 1849, vegnivan ellas manadas d'interpresas privatas. La colliaziun expressa dad «Abys und Bauer» empermetteva in transport spezialmain speditiv: ins spargnava var in di da viadi en cumparegliaziun cun autras charrotschas da posta. Quai aveva però ses pretsch. Il viadi custava dapli che quai ch'in mastergnant gudagnava en media en in mais. Il luxus d'in viadi cun la charrotscha pudevan sa prestar mo paucs. Ils blers gievan vinavant a pe.