L'onn 1869 appellescha il giurist, istoricher e politicher Peter Conradin von Planta (1815–1902) – ensemen cun persunas da medema opiniun – da fundar ina «Fundaziun grischuna per scienza ed art». Lur finamira è quella da stgaffir in museum, en il qual pon vegnir collecziunads e mantegnids bains culturals dal Grischun, per als proteger da la vendita u da la destrucziun.

Cun ses appel sa drizza Conradin von Planta a Grischunas e Grischuns en Svizra ed a l'exteriur, ed als dumonda per donaziuns a favur da ses project. Ultra da daners sa rimnan uschia er objects e cudeschs istorics che furman la basa dal nov museum. L'onn 1872 cuntanscha el sia finamira: il Museum retic avra sia emprima exposiziun en la chasa Buol.

Al cumenzament vegn il museum manà sco classica chasa da pliras spartas, ma la plazza per ils differents secturs da collecziun daventa svelt stgarsa. L'onn 1919 van il Museum d'art ed il Museum da la natira atgnas vias. Il Museum retic concentrescha sias collecziuns da qua envi sin l'istorgia, sin l'archeologia e sin l'etnologia dal Grischun. L'onn 1928 vegn transferida la collecziun en il possess da la Fundaziun Museum retic ch'era vegnida fundada da nov.

Oz è il Museum retic in da trais museums chantunals. Ses champs d'incumbensa centrals èn la collecziun ed il mantegniment d'objects concernent l'istorgia dal Grischun, la perscrutaziun d'inventaris concrets da la collecziun sco er l'intermediaziun da tematicas istoricas ad in vast public tras exposiziuns u tras occurrenzas.