Pressa da stampar, Strada, 1845–1850

Noss object, ina pressa a fis or da lain da laresch, è vegnida duvrada durant il 19avel tschientaner en la stamparia da Strada, en l'Engiadina bassa. Ella funcziuna tenor il princip da Johannes Gutenberg che aveva inventà la stampa da cudeschs il 15avel tschientaner. Dapi lura serviva sia tecnica a la producziun da massa da scrittiras e pia a la derasaziun da savida e da vistas religiusas.

En las differentas regiuns linguisticas dal Grischun ha la stampa da cudeschs gì mintgamai ina differenta impurtanza culturala. Stampats tudestgs pudevan vegnir retratgs relativamain facilmain d'ordaifer. En las vals dal sid talianas era la situaziun pli cumplexa pervia da las confessiuns. Gia Dolfino Landolfi, che ha fundà l'onn 1547 l'emprima stamparia grischuna a Puschlav, ha producì là principalmain scrittiras refurmadas per l'agen diever e per las derasar dascusamain en la Lumbardia catolica vischina.

Stampats rumantschs han stuì vegnir producids per gronda part en stamparias indigenas. Tals stampats han gì ina influenza impurtanta per il svilup da la lingua e da l'identitad linguistica dals Rumantschs. Ina impurtanza speziala en quest connex han gì las translaziuns da la Bibla, dapi che Jachiam Bifrun ha publitgà l'emprima giada l'onn 1560 il Nov Testament en Rumantsch.