06 Extra

Anc oz datti en il Grischun numerusas ruinas da chastels dal temp medieval. Ellas mussan las relaziuns da pussanza dal temp medieval tardiv cun bleras famiglias noblas localas. La charta preschenta ina selecziun dals chastels dal Grischun.

La charta vegn chargiada...

Chastè da l'uvestg a Cuira

Il chastè da l'uvestg a Cuira. Il sez uffizial ed il domicil da l'uvestg oriund datava dal 13. tschientaner. L'edifizi baroc dad oz è vegnì construì il 17. tschientaner sin las restanzas da l'edifizi dal temp medieval.
Fotografia: Tgira da monuments dal Grischun




Chastè da Haldenstein

Chastè da Haldenstein. Construì mez dal 12. tschientaner sco residenza originara dals chavaliers da Haldenstein, era il chastè abità fin en il 17. tschientaner. Il 18. tschientaner è el vegnì devastà da terratrembels.
Fotografia: Tgira da monuments dal Grischun




Chastè da Neu-Aspermont

Il chastè da Neu-Aspermont sper Jenins. Construì mez dal 13. tschientaner sco residenza originara da la famiglia Aspermont, ha il chastè savens midà maun. La segunda mesadad dal 17. tschientaner è el vegnì bandunà ed è svelt ì en muschna.
Fotografia: Tgira da monuments dal Grischun




Chastè da Fracstein a Seewis

Chastè da Fracstein a Seewis. Il chastè da cuvel construì en in lieu spectacular vi d'ina paraid da grip era collià cun in mir che barricadava la val fin giu al flum Landquart. Enconuschents èn ils sgrafits sin ses mirs che dateschan dal 13. tschientaner.
Fotografia: Tgira da monuments dal Grischun




Chastè d'Ortenstein en la Tumleastga

Il chastè d'Ortenstein en la Tumleastga. Il chastè situà sin l’aut d’in grip marcant vegn menziunà per l'emprima giada il 14. tschientaner. Durant la Guerra da Schons, il 1451, vegn el destruì e suenter reconstruì. Fin oz è il chastè en possess privat e vegn abità.
Fotografia: Tgira da monuments dal Grischun




Chastè da Neu-Sins/Canova en la Tumleastga

Il chastè da Neu Sins/Canova en la Tumleastga. Il stabiliment è vegnì erigì il 13. tschientaner dals signurs da Vaz ed è alura passà a la schlattaina dals da Werdenberg. L'onn 1451 è el vegnì destruì durant la Guerra da Schons. Caracteristica è fin oz la tur radunda smesada.
Fotografia: Tgira da monuments dal Grischun




Chastè da Campell a Seglias

Il chastè da Campell a Seglias. La tur da defensiun dal chastè situà aut sur l'Alvra è vegnida construida enturn l'onn 1200. Suenter è il chastè vegnì engrondì pliras giadas ed adattà als basegns da ses abitants actuals. A partir dal 17. tschientaner è el ì plaun a plaun en decadenza.
Fotografia: Tgira da monuments dal Grischun




Chastè da Reziòlta a Seglias

Il chastè da Reziòlta a Seglias. Il mut dal cumplex fortifitgà vegn abità dapi il temp preistoric. En il temp medieval tempriv existiva là in battisteri. Pli tard è vegnida construida sper quel ina baselgia parochiala. Las turs d'abitar dal chastè dateschan dal 11./12. tschientaner. La posiziun da la fortezza permetteva da controllar il passagi tras la Viamala.
Fotografia: Tgira da monuments dal Grischun




Chastè da Razén

Chastè da Razén. Gia l'onn 960 existiva là ina fortezza. Durant il temp autmedieval serviva il chastè sco residenza originara da la famiglia aristocrata impurtanta dals signurs da Razén. L'onn 1497 è il signuradi da Razén daventà possess habsburgais-austriac. Oz è il chastè en possess privat.
Fotografia: Tgira da monuments dal Grischun




Chastè da Belfort

Il chastè da Belfort en la vischnanca d'Alvra. Las parts las pli veglias dal chastè derivan dal temp enturn 1200. El era la sedia principala dals pussants baruns da Vaz. Suenter ch'els èn morts ora, è el passà al possess dals conts da Toggenburg. L'onn 1499 è il chastè vegnì assaglì ed arsentà dals Grischuns.
Fotografia: Tgira da monuments dal Grischun




Chastè da Munt S. Gieri a Vuorz

Il chastè da Munt S. Gieri a Vuorz. Il pli grond cumplex fortifitgà da la Surselva va enavos sin ina fortezza dal temp medieval tempriv. L’areal cumpiglia ina tur d'abitar, in edifizi da represchentaziun cun sala (palas), ina baselgia cun clutger ed in mir circumdant. Il 17. tschientaner è il cumplex vegnì bandunà.
Fotografia: Tgira da monuments dal Grischun




Chastè da Marmels en Surse

Il chastè da Marmels en Surses. Il chastè da cuvel è vegnì construì tranter ils onns 1134 ed 1141. El tutgava a la famiglia de Marmels che steva en servetsch da l'uvestg da Cuira. Il chastè è restà en possess da questa famiglia, fin ch'el è vegnì bandunà la fin dal 14. tschientaner.
Fotografia: Tgira da monuments dal Grischun




Chastè da Tarasp a Scuol

Chastè da Tarasp a Scuol. Las parts las pli veglias da quest cumplex da chastè, il pli grond da l'Engiadina Bassa, derivan dal temp enturn 1050. Suenter che la famiglia aristocratica da Tarasp è morta ora, ha il chastè midà pliras giadas maun ed è la finala passà als conts da Tirol ed als ducas d'Austria. Oz è el en possess da l'artist Not Vital.
Fotografia: Tgira da monuments dal Grischun




Chastè da Tschanüff

Il chastè da Tschanüff en la vischnanca da Valsot. L'istorgia da la construcziun da pliras fasas cumenza avant l'onn 1200. Trais giadas è il chastè vegnì arsentà e puspè reconstruì: durant la Guerra svabaisa 1499, tar ina revolta l'onn 1565 e durant la Guerra da trenta onns 1622 . L'onn 1780 è el vegnì bandunà pervia da sbuvaditschs dal terren.
Fotografia: Tgira da monuments dal Grischun




Chastè da Mesauc

Chastè da Mesauc. Cuntrari a la plipart dals chastels grischuns aveva il Mesauc ina gronda impurtanza strategic-militara ed era ultra da quai dapi il 13. tschientaner il center da pussanza en la val. I aveva num ch’el saja «da conquistar mo tras tradiment u tras fom». Per tema che pussanzas estras pudessan surpigliar il chastè dals signurs da Trivulzio, han las Trais Lias al laschà demolir l'onn 1526.
Fotografia: Tgira da monuments dal Grischun