07 Extra In plan da la citad dal 17. tschientaner L'uschenumnà prospect da Knillenburg mussa Cuira sco citad da mastergnanza e la curt episcopala anc avant l'incendi grond da l'onn 1674. Scuvri la citad dal temp modern tempriv en ses detagls. La curt episcopala. Dapi il temp medieval tempriv serviva l'areal fortifitgà sur la citad sco sedia da l'uvestg. La curt cumpiglia la catedrala, il chastè da l'uvestg, turs, ina curt interna ed ulteriurs edifizis. L'onn 1514 ha l'imperatur Maximilian I separà il territori da la curt da la citad da Cuira e l'ha surlaschada a l'uvestg sco feud. Pir l'onn 1852 è la curt puspè vegnida incorporada en la citad.Fotografia: Museum retic + La baselgia da Son Steffan. Ella è vegnida construida suenter l'onn 500 e serviva als uvestgs da Cuira sco baselgia sepulcrala. En il 17. tschientaner existiva Son Steffan mo pli parzialmain e na vegniva betg pli duvrada sco baselgia. Pir l'onn 1850 – cun construir la scola chantunala – han ins puspè scuvert restanzas da la baselgia. Oz vala ella sco in dals monuments architectonics dal cristianissem tempriv ils pli impurtants da la Svizra.Fotografia: Museum retic + La baselgia da Son Gliezi. Ella deriva dal 8. tschientaner. En il 17. tschientaner sa chattava là ina claustra dals premonstratens. Oz è là il seminari da spirituals.Fotografia: Museum retic + La baselgia da Son Martin. Menziunada enturn l'onn 800 tutga Son Martin tar las baselgias las pli veglias da la citad. Tar l'incendi da l'onn 1464 è ella vegnida donnegiada e suenter puspè reconstruida en stil gotic. L'onn 1523 è Johannes Comander vegnì clamà a la baselgia da Son Martin. Qua ha el midà a la refurmaziun.Fotografia: Museum retic + La chasa da mastergnanza dals cusunzs. Dapi l'onn 1464 era Cuira ina citad da mastergnanza. Las chasas da mastergnanza servivan als commembers sco lieus da radunanza. Qua vegnivan fatgas festas, ma er prendidas decisiuns concernent l'economia da la citad e decisiuns politicas. La chasa da mastergnanza dals cusunzs è vegnida construida il 16. tschientaner e sa chatta oz visavi il Museum retic.Fotografia: Museum retic + La chasa municipala da Cuira. In edifizi predecessur è vegnì destruì durant l'incendi da la citad l'onn 1464. Sin quai è vegnida construida la nova chasa municipala ch'exista anc oz sco sedia uffiziala dal guvern da Cuira. Fin l'onn 1550 cuntegneva ella er anc in ospital. La halla gronda serviva sco lieu da transtgargiada e da martgà. En la paraid dadora è integrada la mesira uffiziala per il pe da Cuira (30 cm).Fotografia: Museum retic + La claustra da Son Nicolai. La claustra dominicana, fundada l'onn 1280 ed avdada davent dal 1288, sa chattava oriundamain davos il mir da la citad. Durant la refurmaziun è la claustra vegnida serrada e transfurmada en ina scola. L'onn 1624 è ella vegnida restituida per in curt temp e suenter utilisada definitivamain per auters intents.Fotografia: Museum retic + La Porta sura. La citad da Cuira medievala era circumdada d'in mir cun pliras turs e portas. Betg tut las turs ch'il prospect da Knillenburg mussa sa laschan però cumprovar istoricamain. La Porta sura, sco entrada la pli impurtanta nà dal sid, è mantegnida fin oz.Fotografia: Museum retic + Il Welschdörfli. Il territori en il sid da la citad era abità gia dapi il temp preistoric. Qua sa chattava er la citad romana Curia. Il num «Welschdörfli» è sa sviluppà durant il temp medieval tardiv, cur che la lingua tudestga ha stgatschà il rumantsch or da Cuira. Ordaifer ils mirs da la citad discurriv’ins anc rumantsch, «welsch».Fotografia: Museum retic + Il santeri Scaletta. Suenter la refurmaziun è vegnì installà in nov santeri ordaifer ils mirs da la citad. Ch'el na sa chattava betg directamain sper ina baselgia, era nov da quel temp. Ch'ins sepuliva qua ultra dals abitants refurmads da la citad er abitants catolics, è extraordinari. Il santeri è stà en funcziun fin l'onn 1862 ed è oz il Stadtgarten.Fotografia: Museum retic + E nua è il Museum retic? La chasa Buol è vegnida construida pir l'onn 1675 e n'è pervia da quai anc betg da vesair sin il prospect da Knillenburg. Percunter chatta ins sin quel l'edifizi antecessur, in arsenal. Avant era là il santeri da la baselgia da Son Martin.Fotografia: Museum retic +