1937

reliev da lain «Jürg Jenatsch»

Arosa, avant l'onn 1935

Jörg Jenatsch (1596‒1639) è la pli enconuschenta figura da l'istorgia grischuna. Quai cunzunt pervia dal roman «Jürg Jenatsch» da Conrad Ferdinand Meyer (1825‒1898) publitgà l'onn 1876. Cun ses cudesch ha il scriptur turitgais evocà in'enorma euforia per Jenatsch.

Artists da tut las spartas han pli tard sa laschà fascinar dal mitus da Jenatsch. Tranter els er il sculptur Hermann Würth (1880-1953) d'Arosa.

Sia sculptura da Jürg Jenatsch è oriundamain stada in regal da l'administraziun da la Viafier retica al Museum d'art dal Grischun. Lez ha regalà vinavant ella al Museum retic. Il directur da lezzas uras, Lorenz Joos, ha prendì en consegna il deposit, «perquai ch'el na dovra betg bler plaz», sco quai ch'el ha scrit cun tun critic.