Cuira, 1929

Tge fa in modern apparat electric per il tegnairchasa d'ina marca svedaisa en la collecziun dal Museum retic? L'istorgia dura fin il mument gist passà – pia rimnain nus er objects contemporans. I na sto betg adina esser products dal Grischun. I basta ch'ins haja utilisà els qua e ch'els simboliseschian sco uschenumnads «objects da sava» a moda exemplarica disas da viver midadas. En quest cas: l'electrificaziun en il tegnairchasa. Fin ils onns 1950 era in tal tschitschapulvra però in apparat da luxus.

Il temp che las chasarinas duevan spargnar tenor las empermischuns da la reclama gieva per gronda part puspè a perder, pertge cun l'introducziun da tals apparats s'augmentavan er ils standards igienics.