Chanta cun pichel, Castaneda, 430‒380 a.C.

L'onn 1935, cur che lavurers da construcziun installavan in conduct d'aua a Castaneda en il Grischun dal sid, han els chattà ina fossa ch'era passa 2000 onns veglia. En quella avevi tranter auter in vasch da bronz ch'era vegnì dà a la persuna defuncta, cur che quella era vegnida sepulida. Retschertgas archeologicas han mussà che la chanta cun pichel derivava da l'Italia centrala. L'inscripziun sin l'ur da questa chanta è la funtauna scritta la pli veglia dal Grischun. Davart sia significaziun exacta n'èn ils scienziads fin oz betg perina.

La tecnica culturala dal scriver appartegna a las innovaziuns impurtantas da quel temp. Ulteriuras novaziuns èn stadas l'economia monetara, la producziun da cheramica sin la rudella da vaschler sco er il diever da fier sco materia prima. E dal fier ha questa epoca – il temp da fier – er ses num.

Da quel temp era il Grischun populà da trais differents circuls culturals. En il sidvest vivevan ils Leponts. Els avevan in viv barat cun il sid. En las vitrinas vischinas sa chattan objects celtics dal Grischun dal nord e dal Grischun central sco er objects dals pievels retics che vivevan al sidost, en Engiadina bassa ed en Val Müstair.