Pulvra dal corn da capricorn, 2009

Dapi il temp medieval tempriv sa preschenta il capricorn dretg si sin la vopna dals uvestgs da Cuira. Pli tard è l'animal imposant l'emprim vegnì duvrà per la vopna da la Lia da la Chadé e la finala per la vopna chantunala. Per far reclama, en spezial per il turissem, serva il capricorn oz sco veritabla mascotta per il Grischun.

Ma betg adina n'han ils Grischuns onurà uschia lur animal da vopna: Perquai ch'ins l'ha attribuì forzas quasi magicas, èsi vegnì fatg chatscha sin capricorns. Or da quasi tut las parts dal corp han ins fatg products terapeutics. La pulvra da sia corna, sco ch'ella è exponida en la vitrina, valeva per exempel sco med da potenza. Pervia da la gronda dumonda per products da capricorn è l'animal vegnì extirpà cumplettamain la mesadad dal 19avel tschientaner.

Mo pli il retg da l'Italia era anc en possess da capricorns en ses territori da chatscha en il Piemunt. La Svizra l'ha supplitgà per intgins animals per als recolonisar. Il retg ha però refusà la dumonda. Pia han ins tschernì meds dischonests: L'onn 1906 èn vegnids engaschads frauduladers d'engular ansiels-capricorn en l'Italia. Quels han ins tratg si e cumenzà ad allevar. Lur descendents han ins recolonisà pass per pass en las Alps svizras. Uschia ha er il chantun Grischun puspè survegnì ina populaziun da ses animal da vopna.