Collecziun da cartas postalas, 1880 fin la mesadad dal 20avel tschientaner

Durant il 19avel tschientaner è il mund alpin dal Grischun s'etablì sco destinaziun da quels giasts ch'eran fascinads da las muntognas. En moda fitg svelta è sa sviluppada ina infrastructura turistica. Contribuì essenzialmain a quai han ils lieus da cura da tuberculosa sco Tavau, nua che pazients da tut l'Europa èn vegnids per sa laschar tractar en il clima alpin. Per als facilitar il viadi è vegnì avert l'onn 1890 l'emprim traject da la Viafier retica davent da Landquart.

Cun gronds hotels e cun novas purschidas da sport ha l'Engiadina ademplì ils giavischs dals giasts bainstants. Il temp da fluriziun turistica avant las guerras mundialas ha fatg or dals vitgs muntagnards destinaziuns mundanas ed ha stgaffì plazzas da lavur per la populaziun.

Entant ch'ils giasts arrivavan l'emprim principalmain durant ils mais da stad, è il turissem d'enviern daventà cun il temp pli e pli impurtant. Ils onns 1928 e 1948 han gì lieu a San Murezzan ils gieus olimpics d'enviern. La segunda mesadad dal 20avel tschientaner è l'ir cun skis daventà in sport da massa. Cunzunt grazia a quai ha il Grischun survegnì nov schlantsch sco chantun turistic. Ozendi vegn la branscha confruntada cun novas sfidas pervia dal martgà che sa mida sco er pervia da la midada dal clima che chaschuna envierns pli chauds cun main naiv.