Chaschiel dal temp da bronz
L’uman ha occupà il territori alpin gia baud. Quai cumprovan las perscrutaziuns archeologicas fatgas sin l’intschess dal Silvretta. Là vegnivan endrizzads dapi il temp da crap campadis stagiunals sut la protecziun natirala da grippa.Fotografia: Servetsch archeologic dal Grischun
+
Da la colonisaziun permanenta da las Alps internas a partir dal temp da bronz (3./2. millenni a.Cr.) resulta ina utilisaziun pli intensiva da las pastgiras da las alps autalpinas. Per pudair restar sin l'alp durant la stad construeva ins gia da quel temp edifizis, cunzunt serragls per il muvel e simplas chamonas per ils pasters.Fotografia: Servetsch archeologic dal Grischun
+
En las muntognas dal Silvretta han ins exchavà plirs serragls da muvel preistorics. En tals champs cun mirs sitgs vegniva serrà en il muvel sur notg per al proteger cunter animals selvadis e cunzunt per al mulscher mintga di. Cheramica, fuclars ed auters chats dattan perditga da las activitads dals pasters.Grafica: Servetsch archeologic dal Grischun
+
Ina sensaziun speziala da las perscrutaziuns en las muntognas dal Silvretta è stada l'exchavaziun durant plirs onns d'ina structura d'edifizis che datescha dal temp da bronz fin il temp da fier (2./1. millenni a.Cr.) en la Val Fenga. Questa exchavaziun è vegnida enconuschenta sco «tegia d'alp la pli veglia da la Svizra».Fotografia: Servetsch archeologic dal Grischun
+
Durant las retschertgas scientificas en las autas muntognas hai adina puspè navì er durant l'auta stad – ma suenter pauc temp era il lieu d'exchavaziun puspè liberà da la naiv ed i pudeva vegnir lavurà vinavant.Fotografia: Servetsch archeologic dal Grischun
+
Las structuras dals edifizis preistorics ston, tenor las enconuschientschas actualas, plitost vegnir reconstruidas sco furmas intermediaras tranter tenda e chamona – ina furma architectonica ch'ins scuntrava anc en parts da las Alps fin avant paucs onns.Fotografia: Servetsch archeologic dal Grischun
+
Grazia a la scuverta da cheramica preistorica han ils lieus da chat alpins pudì vegnir datads cun tschertezza. Da l’autra vart han analisas biochemicas cumprovà per l'emprima giada ch'en quests recipients vegniva elavurà il latg d'alp gia da quel temp.Fotografia: Servetsch archeologic dal Grischun
+
Tge products da latg ch'ins fascheva da quel temp, na pon ins dentant (anc) betg dir. Probablamain eran quai però products d'alp sumegliants ad ozendi, pia chaschiel u paintg.Fotografia: Servetsch archeologic dal Grischun
+