Furma da cular bronz da Savognin – Padnal, ca. 1600–1400 a.C.

En il Grischun ha il pass dal temp da crap al temp da bronz gì lieu avant var 4000 onns. Da quest fatg raquinta er noss object d'exposiziun, ina furma da cular che consista da crap da lavetsch. Vegnida chattada è ella en il rom d'exchavaziuns archeologicas a Savognin Padnal. Là sa chattava da ses temp ina culegna che vegn preschentada sco model en la vitrina visavi. Noss object mussa ch'ils umans sin il Padnal dominavan ina tecnica moderna per da quel temp: il cular bronz. Bronz – in liament or d'ina part zin e nov parts arom – era pli dir che tut ils metals ch'ins enconuscheva fin lura. Cun bronz pudevan ins producir iseglia, armas u – sco cun nossa furma da cular – cliniez.

Minerals d'arom devi en blers lieus dal Grischun, ma il zin stueva vegnir importà nà dal nord. Tras la tecnica da cular bronz ed – en consequenza da quai – tras l'explotaziun da minieras e tras il commerzi èn resultads numerus abitadis en il Grischun. Plaun a plaun èn s'etablidas differentas culturas: Ils umans furmavan cheramica en differenta maniera, sepulivan lur morts en atgna moda e tgiravan lur lieus da cult. A medem temp eran els colliads in cun l'auter tras il commerzi sur ils pass. Quest commerzi als ha purtà in barat da rauba, ma er influenzas culturalas.