Statuetta da Mercur, Cuira – areal Ackermann, 1. tschientaner

Mercur, il dieu roman dal commerzi e dal traffic, vegniva adina preschentà en moda sumeglianta: en maun aveva el in fist, vi dals pes chalzers cun alas e sin chau in chapè cun alas. Grazia a quest chapè cun alas po er nossa statuetta vegnir identifitgada sco Mercur. Quella è vegnida chattada en la ruina d'in incendi dal temp roman a Cuira. Avant bunamain 2000 onns ornava questa figura l'altar d'ina chasa d'abitar, ensemen cun la segunda figura qua daspera: Diana, la dieua da la chatscha.

Suenter la conquista tras ils Romans l'onn 15 a.C. era lur cultura meridiunala sa derasada en il territori alpin. Ussa na veneravan ins qua betg mo lur dieus, mabain discurriva er lur lingua. Ed ins mangiava spaisas mediterranas or da vaschella cotschna da Terra Sigillata e pajava cun daners romans.

Cuira è sa sviluppà ad in center da commerzi impurtant e la finala a la chapitala da la provinza Raetia. Qua avevi edifizis da crap cun stgaudaments romans ad aria chauda e cun picturas muralas. I deva termas e probablamain er in martgà ed in tempel. Per lung da las novas vias, en spezial sur il pass dal Güglia e sur il pass dal Set, èn vegnids construids pausadis e plazzas da transtgargiada per viagiaturs cun lur animals e cun lur rauba.