Model d'in chaval cun sella da sauma, Peist, Lavin, Cuira, senza data

En il Grischun sco pajais da pass avevan il commerzi ed il traffic tranter nord e sid da tuts temps ina gronda impurtanza economica. Perquai che dazis, taxas da passagi e salaris da transport eran funtaunas d'entrada impurtantas. Fin che las vias sur ils pass èn vegnidas modernisadas il 19avel tschientaner, stuevan tut la rauba e tut la martganzia vegnir transportadas sin ils dies d'animals da transport. Per quai èn vegnids duvrads mils che han in pass franc u ils chavals da sauma ch'èn pli gronds. Noss object d'exposiziun correspunda ad in chaval da sauma che pudeva vegnir chargià cun ina chargia fin a 150 kilos. Uschia vegnivan transportads per exempel products da latg en il sid e barattads là per graun, sal u vin.

La rauba vegniva transportada da corporaziuns cooperativas, las uschenumnadas «portas». Ellas eran mintgamai responsablas per in traject. Al cunfin da lur territori vegniva la rauba transtgargiada sin ils animals da la porta vischina. Questa moda da transport era cumplitgada e plitgunsch plauna. Tgi che aveva prescha, stueva trametter sia rauba cun in transport d'express char. In bernier cun ina tala spediziun expressa directa (tudestg «Strackfuhr») fascheva ils ca. 100 kilometers da Cuira fin a Clavenna en var trais dis.