La chombra mirvegliusa. 150 onns Museum retic
Dapi il temp baroc rimnavan en blers lieus prinzis e burgais ritgs gugent objects extraordinaris ch'els preschentavan en uschenumnadas chombras mirvegliusas. Savens na sa laschavan els betg restrenscher da rigurus concepts da collecziun: natiralias, objects d'art, antiquitads e curiusitads. Tut quai deva ina maschaida giaglia e fascinanta.
Il museum modern, sco che nus al enconuschain oz, è ina invenziun burgaisa dal 19avel tschientaner. En tut l'Europa èn resultadas quella giada novas chasas d'exposiziun. Er il Museum retic ha avert sias portas l'onn 1872.
Dapi lura vegni rimnà en il museum. En il fratemp cumpiglian ses inventaris var 100 000 objects. A chaschun dal giubileum As envidain nus da far in viadi d'exploraziun tras ses stgazis, quai a maun da 150 exponats. Per mintga onn dapi l'avertura è vegnì tschernì in object che ha chattà sia via en la collecziun durant quel onn. Uschia dat l'exposiziun ina survista represchentativa: chaussas custaivlas, veglias e raras èn preschentas gist tuttina sco chaussas surprendentas, banalas u stranas, tut in sper l'auter, tut en il stil da l'anteriura chombra mirvegliusa.
Tut las istorgias e tut las infurmaziuns davart ils objects da questa exposiziun chattais Vus sin noss mediaguide. Faschai in scan dal code QR cun Voss smartphone u dumandai in tablet a la recepziun. [QR-CODE]
